Become Owner For Vijaya Dairy Cafe
హైదరాబాద్: తెలంగాణ రాష్ట్ర డెయిరీ డెవలప్‌మెంట్ కోఆపరేటివ్ ఫెడరేషన్ (TSDDCF) విజయ డెయిరీని పునరుజ్జీవింపజేయడానికి, దాని విస్తరణకు దూకుడుగా ముందుకు సాగుతోంది. ఇందులో భాగంగా రాబోయే 100 రోజుల్లో రాష్ట్రవ్యాప్తంగా 100 విజయ కేఫ్‌లు, పార్లర్లను ఏర్పాటు చేయాలని లక్ష్యంగా పెట్టుకుంది. ట్యాంక్ బండ్‌పై విజయ కేఫ్‌ పైలట్ ప్రాజెక్టు విజయవంతం కావడంతో, ఈ విస్తరణ ప్రణాళికలను వేగవంతం చేశారు.
గత ప్రభుత్వాల నిర్లక్ష్యం కారణంగా తీవ్ర నష్టాలను చవిచూసిన విజయ డెయిరీని తిరిగి లాభాల బాట పట్టించేందుకు ప్రస్తుత ప్రభుత్వం కృషి చేస్తోంది. ఈ విస్తరణ ప్రణాళికలో భాగంగా హైదరాబాద్‌లో సుమారు 30-35 కేఫ్‌లు, రాష్ట్రవ్యాప్తంగా మొత్తం 100 పార్లర్లను 100 రోజుల్లో ప్రారంభించాలని లక్ష్యంగా పెట్టుకున్నారు.
ఈ కేఫ్‌లు, పార్లర్ల ద్వారా విజయ డెయిరీ ఉత్పత్తులైన పాలు, పెరుగు, మజ్జిగ, లస్సీ, నెయ్యి వంటివి ప్రజలకు మరింత అందుబాటులోకి తీసుకురావాలని TSDDCF భావిస్తోంది. తద్వారా మార్కెటింగ్ వ్యవస్థను మరింత బలోపేతం చేయనున్నారు.
విజయ కేఫ్‌ లేదా పార్లర్ తెరవాలనుకునే ఆసక్తి ఉన్నవారికి ఫ్రాంఛైజ్ అవకాశాలను కూడా ఫెడరేషన్ అందిస్తోంది. ఆసక్తిగల వ్యక్తులు ప్రధాన కార్యాలయాన్ని సంప్రదించవచ్చు లేదా వారి వెబ్‌సైట్ ద్వారా దరఖాస్తు చేసుకోవచ్చు. ఒక పార్లర్ తెరవడానికి సుమారు రూ. 1 నుండి 5 లక్షల పెట్టుబడి అవసరం కాగా, ఒక పెద్ద కేఫ్‌కు రూ. 10 నుండి 15 లక్షల వరకు ఖర్చవుతుంది.
ఈ విస్తరణ ప్రణాళికల వెనుక ప్రధాన లక్ష్యాలలో ఒకటి ఉద్యోగ అవకాశాలను సృష్టించడం. మొత్తంగా, తెలంగాణ రాష్ట్ర డెయిరీ డెవలప్‌మెంట్ కోఆపరేటివ్ ఫెడరేషన్ రాష్ట్రవ్యాప్తంగా మొత్తం పార్లర్ల సంఖ్యను 300కు పైగా పెంచాలని యోచిస్తోంది.
